युएईले रोक्यो नेपालीको भिसा

दुबईले नेपालीलाई भिजिट (भ्रमण) भिसामा आउन पूर्ण रूपमा बन्द गरेको छ। यसबारे कुनै आधिकारिक जानकारी नगराए पनि दुबईले नेपालीहरूलाई सोमबारदेखि भिजिट भिसा अर्थात् घुम्न वा भ्रमणमा जाने भिसा दिन छाडेको हो।

दुबईले नेपालीलाई डिसेम्बरदेखि नै भिसा दिन बन्द जस्तै गरेको थियो। भिसा पाउने सम्भावना नभएपछि नेपालीहरूले युएईको शारजाह राज्यका लागि भिसा आवेदन दिने गरेका थिए। युएईले भिसा बन्द गर्नुको पछाडि केही कारण रहेको बताइएको छ।

नेपालीहरू भिजिट भिसामा जाने अनि उतै काम खोजेर बस्ने गरेको, भिजिट भिसामा गएर उतै गैरकानुनी तरिकाले बस्ने गरेको र यसलाई युएईले सुरक्षा चुनौतीका रूपमा लिएको, युएईलाई ट्रान्जिट बनाएर युरोप, अमेरिका जाने गरिएको। सोही क्रममा थुप्रै नेपालीहरू ठगिएका र  भदौ २४ गतेको प्रदर्शनका कारण जेलबाट कैदीबन्दी भागेको र युएई आउन सक्ने भनेर युएईले भिसा दिन रोकेको हो ।

अहिले युएईमा ८ लाख हाराहारीमा नेपाली भएको अनुमान छ।