बाढीपीडितको सम्झनामा न्युयोर्कमा दसैं उत्सव

न्युयोर्क सिटीले भोटेकोशी बाढीलगायत प्राकृतिक विपत्तिमा ज्यान गुमाएकाहरूको सम्झनामा दसैं उत्सव आयोजना गरेको छ । सिटी हलको ऐतिहासिक च्याम्बर भवनमा आयोजित कार्यक्रममा मृतकहरूको सम्झनामा मौनधारण गरिएको थियो । घर तथा परिवार गुमाएका बाढीपीडितप्रति सहानुभूति व्यक्त गर्दै मृतकहरूको आत्माको शान्तिको कामना गरिएको थियो । पण्डित उद्धव शास्त्री र दीपक खरालले प्रार्थना गरेका थिए ।

कार्यक्रममा स्वस्तिवाचन, फूल तथा टीका वितरणसँगै नेपाली संस्कृति झल्कने सांस्कृतिक प्रस्तुति गरिएको थियो । एन्जेला शाहले प्राकृतिक विपत्ति र त्यसले पारेको असरलाई सांकेतिक रूपमा प्रस्तुत गर्ने नृत्य देखाएकी थिइन् । रेविका श्रेष्ठ, अभिषेक प्रधान र प्रनिश चित्रकारले बाढीपीडितको सम्झनामा सांगीतिक प्रस्तुति दिएका थिए ।