१८ अक्टुबरमा रकी माउन्टेनले दसैँ विशेष कार्यक्रम गर्दै

कोलोराडो : अमेरिकाको कोलोराडोस्थित अग्रणी संस्था रक्की माउन्टेन फ्रेण्ड्स अफ नेपाल (आरएमएफएन)ले १८ अक्टुबरमा दसैँ विशेष शुभकामना कार्यक्रम गर्ने निर्णय गरेको छ । गएको आइतबार कोलोराडोस्थित नेपाली घरमा बसेको संस्थाको बोर्ड बैठकले १८ अक्टुबरमा दसैँ तिहार विशेष शुभकामना आदान प्रदान कार्यक्रम गर्ने निर्णय गरेको हो ।

यसअघि वर्षौदेखि दसैँ तिहारमा गर्दै आएको सांस्कृतिक कार्यक्रम भने यस वर्ष नहुने भएको छ । नेपालमा ८ र ९ सेप्टेम्बरमा भएको जेनजी आन्दोलनमा सरकारले बल प्रयोग गर्दा ७४ जना युवाहरुले ज्यान गुमाएको र सयौँ घाइते भएका कारण यसपटक उनीहरुको बलिदानको सम्मानमा एक मिनेट मौनधारण गरेर शुभकामना मात्रै आदानप्रदान गर्ने निर्णय गरिएको संस्थाकी अध्यक्ष आकृति राईले जानकारी दिइन् ।

‘देश रोइरहेको बेला, आन्दोलनमा नेपाली आमाका छोराहरु गोली लागेर ढलेका बेला, युवाहरु सहिद भएको बेला हामी अमेरिकामा रमाउन सक्दैनौँ’ उनले बोर्ड बैठकमा पदाधिकारी तथा सदस्यहरुलाई सम्बोधन गर्दै भनिन्, ‘यसपटक हामी उनीहरुको सम्मानमा एक मिनेट मौनधारण गर्छौँ । घाइतेहरुको शीघ्र स्वास्थ्यलाभको कामना गर्छौँ । केही सहयोग संकलन गरेर घाइतेहरुको उपचार तथा आर्थिक अवस्था कमजोर भएका जेनजी परिवारलाई सहयोग पनि गर्छौँ । जेनजीहरुको बलिदामा यसपटक सांस्कृतिक कार्यक्रम स्थगित गरेका छौँ ।’

यसपटकको दसैँ तिहार कार्यक्रम विशेष बनाउन नेपाली सुगम संगीतका लोकप्रिय गायक दाजुभाई स्वरुपराज र सत्यराज आचार्य ल्याउने तयारी अन्तिम चरणमा पुगेको थियो । तर यसपटक देशले ठूलो परिवर्तन पाउँदा युवाहरुले आन्दोलनमा ज्यान गुमाएका र सयौँ युवाहरु घाइते भएका कारण सांस्कृतिक कार्यक्रम स्थगित गर्नुपरेको उनले बताइन् ।

नेपाली घरमै आयोजना गरिने दसैँ तिहार विशेष शुभकामना कार्यक्रममा कोलोराडोमा रहेका सबै संघ संस्थाका प्रमुख तथा प्रतिनिधि एवं कोलोराडोबासी सबैलाई आमन्त्रण गरिएको संस्थाका निवर्तमान अध्यक्ष अर्जुन बगालेले बताए । उनका अनुसार यसपटक सांस्कृतिक कार्यक्रम नहुने भएकाले टिकटबापतको पैँसा स्वेच्छाले चाहने व्यक्तिले जेनजी आन्दोलनका घाइते र परिवारलाई हस्तान्तरण गर्न सहयोग गर्न सकिने पनि बताए ।

बैठकमा नयाँ थपिएका सदस्य र विभिन्न विभागका संयोजकलाई निवर्तमान अध्यक्ष बगाले, अध्यक्ष राई र उपाध्यक्ष हरि गुरुङले खादा लगाउँदै प्रमाणपत्र वितरण तथा संस्थाको विकास र विरासत पुस्तक हस्तारण गरेर स्वागत गरेका थिए ।