कोलोराडोमा नेपाली दुतावासको घुम्ती शिविर हुँदै

अरोरा : अमेरिकास्थित नेपाली दूतावासले कोलोराडोमा पनि घुम्ती सेवा शिविर सञ्चालन गर्दैछ । आउँदो अक्टोबर १० देखि १२ सम्म कोलोराडोमा स्थापित संस्था हेल्पिङ ह्यान्ड्स हेल्थ एजुकेसन संस्थाको मुख्य प्रायोजनमा ‘नेपाली दूतावास कोलोराडो घुम्ती सेवा शिविर’ कार्यक्रम सञ्चालन हुन लागेको हो ।

यो घुम्ती सेवा शिविर कार्यक्रम सञ्चालन गर्न नेपाली घर कोलोराडो संस्थाले सबै संघ संस्थासँग समन्वय र सहकार्य गरेर अगुवाई गरिरहेको छ । यस्तै रकी माउन्टेन फ्रेण्ड्स अफ नेपाल (आरएमएफएन) र एनआरएनए अमेरिका कोलोराडो च्याप्टर सहयोगी तथा समन्वयकारी भूमिकामा छन् ।

१०, ११ र १२ अक्टोबर तीन दिनसम्म सञ्चालन हुने यो कार्यक्रममा नेपाली दुतावास अमेरिकाका वरिष्ठ अधिकारी तथा विषयविज्ञहरु सहभागी हुनेछन् । शिविरमा नेपाली राहादानीका विविध सेवा, अध्यागमनबारेका जानकारी तथा अमेरिका बसाईका क्रममा उत्पन्न समस्या तथा जिज्ञासाहरुको समाधान खोजिने कार्यक्रमको अगुवाई गरिरहेको नेपाली घर संस्थाले विज्ञप्ती निकालेर जनाएको छ ।

कार्यक्रमलाई सफल र सभ्य बनाउन हेल्पिङ ह्यान्ड्स हेल्थ एजुकेसन, रक्की माउन्टेन फ्रेण्ड्स अफ नेपाल (आरएमएफएन) र एनआरएनए अमेरिका कोलोराडो च्याप्टरले संयुक्त रुपमा विज्ञप्ती जारी गरेर पनि सबै कोलोराडोका संघ संस्था, समाजसेवी बुद्धिजिवी, व्यवसायी र सरोकारवालालाई सहयोग गर्न आग्रह गरेका छन् ।

कोलोराडो वेष्टमिनिस्टरस्थित नेपाली घरमा आयोजना हुने कार्यक्रममा सहभागी हुन सबैलाई संघ संस्थाहरुले अपील पनि गरेका छन् ।