कोलोराडोमा नेपाली दुतावासको घुम्ती सेवा शिविर सम्पन्न

अरोरा : अमेरिकामा रहेको नेपाली दुतावासको कोलोराडो घुम्ती सेवा शिविर भव्य रुपमा सम्पन्न भएको छ । कोलोराडो राज्यको वेष्टमिनिस्टरस्थित नेपाली घरमा शुक्रबार, शनिबार र आइतबारसम्म गरि तीन दिन चलेको घुम्ती सेवा शिविर भव्य रुपमा सम्पन्न भएको हो ।

हेल्पिङ ह्याण्ड्स हेल्थ एजुकेशन, नेपाली घर, रक्की माउन्टेन फ्रेण्ड्स अफ नेपाल (आरएमएफएन) र एनआरएनए अमेरिका कोलोराडो च्याप्टरको आयोजनामा भएको ‘राहदानी कन्सुलर सेवा शिविर’ सफलतापूर्वक सम्पन्न भएको शिविरका सम्पर्क व्यक्तित्व एवं आरएमएफएनका निवर्तमान अध्यक्ष अर्जुन बगोलेले जानकारी दिए ।

उनका अनुसार तीन दिनसम्म सञ्चालन भएको शिविरमा कोलोराडोसहित झण्डै दर्जन बढी राज्यमा रहेका पाँच सय बढी नेपालीले प्रत्यक्ष रुपमा सेवा लिएका छन् । तीन दिनमा ६ सय जनाले शिविरमा सेवा प्राप्तिका लागि आवेदन फारम दर्ता गराएका थिए ।

तीन दिनमा चार सय जनालाई सेवा दिने संख्या निर्धारण गरिएपनि थप दुई सय जना गरेर झण्डै ६ सय जनाले आवेदन दर्ता गराएका थिए । त्यसरी आवेदन दर्ता गराएर सेवा लिनेमा कोलोराडो, टेक्सास, यूटाहा, क्यालिफोर्निया, नेभाडा लगायत दर्जन बढी राज्यमा बसोबास गर्ने नेपाली रहेका पनि बगालेले बताए ।

‘लामो समयपछि नेपाली दुतावासको घुम्ती शिविर कार्यक्रम भएकाले पनि धेरै नेपालीले नाम दर्ता गराएरै राहदानी नवीकरण गर्ने सेवा लिएका छन्’ उनले भने, ‘यसले अमेरिकामा रहेको नेपाली दुतावास र अमेरिकामा बसोबास गर्ने नेपालीहरुबीचको सम्बन्ध तथा सेवा सुविधा प्रत्यक्ष रुपमा विस्तार भएको छ । नेपालीहरु प्रत्यक्ष रुपमा सेवा पाएर लाभान्वित भएका छन् ।’

नेपाली घरका वरिष्ठ उपाध्यक्ष गंगा चौलागाइँले राहादानी कन्सुलर सेवा शिविरमा ५ सय ५ जनाको नेपाली पासपोर्ट नवीकरण भएको बताए । यस्तै २४ जना नेपाली समुदायका अमेरिकी नागरिकको नेपाली एनआरएनए कार्ड नवीकरण पनि भएको उनले जानकारी दिए ।

‘तीन दिनमा बिहानदेखि बेलूकीसम्मै शिविरमा नेपालीहरुले नाम दर्ता गराएरै सेवा लिए’ उनले शिविर सम्पन्न भएको जानकारी दिँदै भने, ‘दर्जन बढी राज्यमा बसोबास गरिरहेका नेपालीहरु प्रत्यक्ष रुपमा नेपाली घरमा सञ्चालित शिविरमा उपस्थित भएर ५०५ जनाले पासपोर्ट नवीकरण गर्दा २४ जनाको नेपाली एनआरएनए कार्ड पनि नवीकरण भएको छ ।’

उनका अनुसार अमेरिकाको वाशिंटन डिसीस्थित नेपाली राजदुतावासका काउन्सिलर अरुणा घिसिङको नेतृत्वमा आएको चार सदस्यीय टोलीले शिविरमा नेपाली राहादानी तथा एनआरएनए कार्ड नवीकरण सेवा प्रदान गरेको थियो । 

कोलोराडोमा नेपाली दुतावासको राहादानी कन्सुलर सेवा शिविर सम्पन्न गर्न ७० जनाभन्दा बढी स्वयंमसेवक टोली परिचालन गरिएको पनि उनले बताए । कोलोराडोमा सक्रिय समाजसेवी, व्यवसायी, अभियान्ता तथा युवाहरुको सक्रिय सहभागिता र स्वयंमसेवाले गर्दा सयौँको संख्यामा रहेका सेवाग्राहीलाई सेवा दिन सहज भएको पनि चौलागाईँले बताए ।

‘यो शिविर सहज रुपमा सम्पन्न गर्न भोलेन्टियरको योगदान धेरै महत्वपूर्ण रह्यो’ उनले कार्यक्रम सफलताबारे अगाडि भने, ‘कोलोराडोमा रहेका विभिन्न संघ संस्थाका प्रमुख तथा प्रतिनिधि, समाजसेवी, व्यवसायी, अभियान्ता तथा युवाहरुको योगदानले गर्दा काउन्सिलर टोलीले संयौँको संख्यामा रहेका सेवाग्राहीलाई सेवा दिन धेरै सहज भएको छ । कोलोराडोबासी नेपाली समुदायको एकता, भ्रातृत्व र सहयोगी भावनाले फेरि एकपटक सबैको मन जितेको छ । यसका लागि सबैलाई धन्यवाद ।’

राहादानी कन्सुलर सेवा शिविरलाई प्रभावकारी रुपमा सञ्चालन तथा सम्पन्न गर्न आयोजक संस्थासँगै कोलोराडोमा रहेका अन्य संघ संस्थाले पनि खानेपानी, खाजा लगायतको सहयोग गरेका थिए । 

नेपाली राहादानी कन्सुलर सेवा शिविर प्रभावकारी रुपमा सम्पन्न भएपछि दुतावासकी काउन्सिलर तथा घुम्ती सेवा शिविर प्रमुख अरुणा घिसिङले कोलोराडोमा आयोजना गर्ने आयोजक संस्था, सहयोगी संस्था, स्वयंमसेवक, कोलोराडोका समाजसेवी, व्यवसायी, सबै संघ संस्थाका प्रमुख तथा प्रतिनिधि लगायत सेवाग्राहीलाई पनि धन्यवाद दिएकी थिइन् ।

यस्तै समापन कार्यक्रममा बोल्दै मूल आयोजक नेपाली घरका अध्यक्ष बसन्त लम्सालले सबैको साथ र सहयोगले नेपाली दुतावासको कोलोराडो घुम्ती सेवा शिविर कार्यक्रम सफलतापूर्वक सम्पन्न भएकोमा सबैलाई धन्यवाद ज्ञापन गरेका थिए । कोलोराडोमा दुतावासको ऐतिहासिक घुम्ती सेवा शिविरलाई भव्य रुपमा सफल पार्ने सबैप्रति उनले आभार व्यक्त गरेका थिए ।

यस्तै हेल्पिङ ह्यान्ड्स हेल्थ एजुकेसनका प्रमुख नारायण श्रेष्ठले पनि नेपाली घरमा आयोजित घुम्ती सेवा शिविरमा प्रत्यक्ष उपस्थित भएर सेवा लिएका सेवाग्राही तथा भोलेन्टियर भएर सेवामा सहजता ल्याएका कोलोराडोका आयोजक संघ संस्थासँगै सहयोगी संघ संस्थालाई पनि धन्यवाद दिएका थिए ।

कार्यक्रमलाई सफलतापूर्वक सम्पन्न गर्ने आयोजक, स्वयंमसेवक, सहयोगी संघ संस्थालाई पनि प्रोत्साहनस्वरुप घुम्ती सेवा शिविरकी प्रमुख काउन्सिलर अरुणा घिसिङले प्रमाणपत्र प्रदान गरेकी थिइन् ।

सबै फोटो : नातीबाबु भट्ट/कोलोराडो