जेनजी सहिदको सम्झनामा रक्की माउन्टेनको दसैँ तिहार कार्यक्रम

अरोरा : नेपालमा जेनजी आन्दोलनमा आफ्नो बलिदान दिएका जेनजी सहिदहरुको सम्झनामा अमेरिकाको कोलोराडोमा दसैँ तिहार शुभकामना कार्यक्रम सम्पन्न भएको छ । कोलोराडोको अग्रणी संस्था रक्की माउन्टेन फ्रेण्ड्स अफ नेपाल (आरएमएफएन)ले यसपटकको दसैँ तिहार कार्यक्रम जेनजी सहिदहरुको सम्मान तथा सम्झनामा सामान्य रुपमा शुभकामना साटासाट गरेर सम्पन्न गरेको हो ।

गएको अक्टोबर ८ र ९ मा काठमाडौँमा भ्रष्टाचारविरुद्ध सडकमा उत्रिएको जेनजी पुस्ताको आन्दोलनमा सरकारले दमन गर्दा ७६ जनाको ज्यान गएको थियो । सयौँ घाइते अहिले पनि अस्पतालमा उपचारारत छन् । रक्की माउन्टेनले यसपटकको दसैँ तिहार कार्यक्रम जेनजी आन्दोलनमा बलिदान दिने सहिदको सम्मान तथा घाइतेहरुको शीघ्र स्वास्थ्यलाभको कामना गर्दै कोलोराडोमा हरेक वर्ष गर्दै आएको राष्ट्रिय कलाकारसहितको विशेष सांस्कृतिक कार्यक्रम स्थगित गरेर सामान्य रुपमा शुभकामना साटासाट गरेर मनाउने निर्णय गरेको थियो ।

सोही अनुसार कार्यक्रममा शुभकामना आदान प्रदान गरिएको र जेनजी आन्दोलनबाट प्रभावित घाइतेहरुलाई सहयोग गर्न ‘डोनेसन बक्स’मार्फत सहयोग संकलन गरिएको संस्थाका निवर्तमान अध्यक्ष अर्जुन बगालेले जानकारी दिए । उनका अनुसार कार्यक्रमबाट उठाइएको रकममा थप गरेर जेनजी आन्दोलन प्रभावितलाई सहयोग नेपाल पठाइनेछ ।

कार्यक्रममा प्रमुख अतिथी तथा संस्थाकी पहिलो महिला अध्यक्ष निलम श्रेष्ठले जेनजी सहिदहरुप्रति श्रद्धाञ्जली व्यक्त गर्दै कोलोराडोमा यसपटक मनाइएको दसैँ तिहार शुभकामना कार्यक्रम इतिहासमा विशेष कार्यक्रमका रुपमा अभिलेख हुने बताइन् । 

यस्तै विशेष अतिथी नारायण श्रेष्ठ र प्रा.डा.विजय शर्माले सबैलाई दसैँ तिहारको शुभकामना व्यक्त गर्दै जेनजीकै भावनाअनुसार नेपाली डायस्पोराका संघ संस्थामा पनि युवाहरुको सक्रिय सहभागिता र योगदान तथा नेतृत्वलाई प्रोत्साहन गर्नुपर्ने बताए ।

कार्यक्रमकी सभापति तथा संस्थाकी अध्यक्ष आकृति राईले नेपाली घरमा आयोजित सबै कार्यक्रमका सहभागीलाई धन्यवाद व्यक्त गर्दै यसपटकको कार्यक्रम जेनजीप्रति समर्पित गरेर सँधै नेपाल र नेपालीको पक्षमा रहेको स्पष्ट सन्देश दिन रक्की माउन्टेन सफल रहेको पनि बताइन् ।

कार्यक्रममा मनोज तुुलाधार, सम्झना पाण्डेय, रेनिसराज मैनाली तथा जेसिका शर्माले गायन तथा नृत्य प्रस्तुत गरेका थिए । संस्थाका अध्यक्ष राई, निवर्तमान अध्यक्ष बगाले तथा उपाध्यक्ष हरि गुरुङले प्रमुख अतिथी, विशेष अतिथी एवं अतिथीलाई स्वागत तथा सम्मान गर्दै प्रस्तुती दिएका कलाकारलाई पनि प्रोत्साहनस्वरुप सम्मानपत्र प्रदान गरेका थिए ।

यो कार्यक्रमलाई कोलोराडोको नेपाली समुदायको इतिहासमा पहिलोपटक प्रमुख अतिथी तथा कार्यक्रम अध्यक्ष दुवै महिला रहेको महत्वपूर्ण कार्यक्रमका रुपमा पनि हेरिएको छ ।