अमेरिकाबाट बढ्दो डिपोर्ट हुने नेपालीको संख्या घट्यो

नयाँ राष्ट्रपति डोनाल्ड ट्रम्प प्रशासन भएयता अमेरिकाबाट नेपाल फर्काइएका अर्थात डिपोर्ट हुने नेपाली नागरिकको संख्या बढेको छ । तर पछिल्लो महिना भने डिपोर्ट हुने नेपालीहरुको संख्या घटेको विगतका तथ्यांकले देखाएको छ । त्रिभुवन अन्तर्राष्ट्रिय विमानस्थलको अध्यागमन कार्यालय अनुसार सन् २०२५ को अगस्ट महिनामा १६ जना नेपाली मात्र डिपोर्ट भएका छन् ।

जसमा १ जना महिला र १५ जना पुरुष रहेका छन् । सन् २०२५ को जनवरी २० देखि जून ३० सम्ममा अमेरिकी राष्ट्रपति डोनाल्ड ट्रम्पको दोस्रो कार्यकाल सुरु भएयता कुल २१५ जना नेपाली डिपोर्ट भएका हुन् । जसमा १ सय ९७ जना पुरुष र १८ जना महिला रहेका छन् ।

नेपालीको टीपीएस समाप्त भइसकेकाले यो संख्या आगामी दिनमा बढ्ने अनुमान गरिएको छ किनभने अमेरिकाबाट देशनिकालाको आदेश पाइसकेका झण्डै १५ सय नेपालीहरु टीपीएसबाट संरक्षित छन् । उनीहरुको टीपीएस अगस्त २० मा समाप्त भइसकेकाले अमेरिकी अध्यागमनले उनीहरुलाई पक्राउ गरेको खण्डमा सिधै डिपोर्ट गर्न सक्छ । त्यस्तै विगतमा टीपीएसले नसमेटेका झण्डै १५ सय नेपालीहरु पनि देशनिकालाको आदेश पाइसकेपछि अमेरिकामा नै बसिरहेको तथ्यांक हालै आइएसले सार्वजनिक गरेको छ ।

जनवरीदेखि नेपालीहरुको डिपोर्टको तथ्याकं लाइ हेर्दा जनवरी, फेब्रुअरी, जुलाई र अगस्त महिनाको संख्या तुलनात्मक रुपमा कम हो । सबै भन्दा धेरै मेमा ५८ र जून महिनामा ४२ जना नेपालीहरु अमेरिकाबाट डिपोर्ट भएका थिए । मे महिनाको तुलनामा अगस्तमा डिपोर्ट हुने नेपालीहरुको संख्यामा झण्डै ७२ प्रतिशतले कमी देखिएको छ । तथ्यांकअनुसार सन् २०२५ मा जनवरीमा ६ जना, फेब्रुअरीमा १८ जना, मार्चमा ३२ जना, अप्रिलमा २६ जना, मेमा ५८ जना, जूनमा ४२ र जुलाईमा १७ जना नेपाली डिपोर्ट भएका थिए ।

स्रोत : खसोखास डटकम