नेपाली डायस्पोराको ‘१०० प्रभावशाली व्यक्तित्व’ सूचि निकालिदै

संसारको शिर बोकेको सर्वोच्च शिखर सगरमाथा । अनि शान्तिका प्रतिक भगवान गौतम बुद्ध । यी दुई नामले नेपाल संसारभर सबैभन्दा माथिल्लो परिचय बोकेर चिनिन्छ । तर यी दुई नाम लिएर नेपालीले संसारभर नेपाल चिनाइरहेका छन् । यो वर्षौदेखि नेपालीले चलाइरहेको अघोषित अभियान हो । र, वर्षौसम्म अघोषित रुपमा नै यो अभियान चलिरहनेछ ।

किनकी नेपालीहरु जसरी दैनिक हजारौको संख्यामा विभिन्न देशमा पुगिरहेका छन्, त्यसरी नै नेपाली चिन्ने, चिनाउने र संसारभर फैलाउने अभियान झन् तीव्र गतिमा फैलिरहेको छ । यो न कसैले रोक्नेछ, न कसैले रोक्न सक्नेछ । न त कसैले रोकेर रोक्न सम्भव छ ।

विश्वभरका सबै देशमा पुगिसकेका नेपालीहरु विस्तारै आफ्नै सीप, क्षमता र पौरखमा स्थापित हुने क्रम बढ्दो छ । यसले सबै देशमा नेपाल चिन्ने र चिनाउने अभियान तीव्र गतिमा फैलाउन भरपुर सहयोग गरिरहेको छ । 

त्यसमाथि सन् २००३ मा गैरआवासीय नेपाली संघ (एनआरएनए) संस्था स्थापित भएर धेरै देशमा विस्तार भएपछि यो अभियानमा नेपालीहरुको होडबाजी नै चलेको छ । धेरैजसो एनआरएनए संस्थामा आबद्ध भएर नेपाल चिन्ने र चिनाउने अभियान तथा कार्यक्रम सञ्चालन गरिरहँदा धेरै नेपाली भने आफ्नै पेशा तथा व्यवसायमा विश्वमै प्रतिष्ठित हुने गरि काम गरिरहेका छन् । जसले नेपाल र नेपालीको परिचय र पहिचान झन् नयाँ उचाइमा पुर्याएको छ ।

यस्तो अवस्थामा संसारभर लाखौँ नेपालीहरु दैनिक रुपमा चर्चा, विवाद र लोकप्रियताको सूचिमा चढिरहेका छन् । धेरैको राम्रो काम र कर्मको प्रशंसा भइरहँदा कतिपय विवादित कामले फसिरहेका छन् । कति दुःखले उठेका छन् भने कतिपय संघर्षले साहसिक बन्दै सफलताको सगरमाथा चढिरहेका छन् ।

सफलताको सिढी चढिरहेकाहरु नयाँ नयाँ सूचकमा आफूलाई उभ्याइरहेका छन् । अनि संसारभर नेपालीको गौरव र पौरख चम्काइरहेका छन् । यस्तो अवस्थामा विश्वभर रहेका लाखौँ नेपालीमाझ को ? कति ? र कहिलेसम्म ? चर्चित वा लोकप्रिय भन्नेमा अन्योलता बढेको छ । 

कतिपय नेपाली वर्षौदेखि चर्चित छन् । उनीहरु लोकप्रिय बनिरहेका छन् । नयाँ नयाँ उदाएका नेपाली डायस्पोराका प्रभावशाली व्यक्तित्वहरु पूरानाहरुको छाँयामा पनि परिरहेका छन् । धेरै जना अन्तर्राष्ट्रिय मिडियाका हेडलाइनमा छन् । तर देशले चिन्न सकेको छैन । अझै देशभित्रै रहेका नेपालीले चिन्न पाएका छैनन् । अनि विदेशमा रहेका नेपालीहरुमाझ पनि उनीहरु निर्विवाद रुपमा उत्कृष्ट छन् वा छैनन् भन्नेमा अन्यौल छ ।

हामी त्यो अन्यौल चिर्न चाहन्छौँ । भ्रमहरु हटाएर उनीहरुका राम्रा र उत्कृष्ट कामहरुको आधारमा नेपाली डायस्पोराका ‘१०० प्रभावशाली व्यक्तित्व’सूचिमा समेट्न चाहन्छौँ । जसले सयौँको संख्यामा लाखौँ नेपालीमाझ नयाँ र विशिष्ट परिचय बनाउन सकून भन्ने हाम्रो चाहना छ ।

यसलाई हामीले उनीहरुले गरेको उत्कृष्ट कामको सम्मान र सर्वप्रिय अनुमोदनका रुपमा पनि लिएका छौँ । किनकी उनीहरुले गरेको राम्रो काम, कर्म र कर्तव्यको कही न कही मूल्यांकन हुनुपर्छ भन्नेमा विश्वास गर्छौ ।

यसका लागि हामीले विभिन्न देशमा रहेका नेपाली पत्रकारले सञ्चालन गरेका न्युजपोर्टलमा प्रकाशित समाचार तथा प्रोफाइल स्टोरीलाई आधार बनाउनेछौँ । अनि काठमाडौँबाट प्रकाशित मूलधारका अनलाइन न्युज पोर्टल, पत्रिका, टेलिभिजन तथा सामाजिक सञ्जालका पेजहरुमा प्रकाशित स्टोरीलाई पनि स्रोत खुलाएर संकलन गर्नेछौँ । जसले हामीलाई निर्विवाद रुपमा विश्वभर रहेका नेपाली डायस्पोराका ‘१०० प्रभावशाली व्यक्तित्व’ छनौट गर्न सहज हुनेछ ।

यो सूचिमा नेपाली डायस्पोराका लिजेन्ड अभियान्ता, व्यवसायी, समाजसेवी, कलाकार, लेखक, पत्रकार, साहित्यकार, डाक्टर, इन्जिनियर र खेलाडी समावेश हुनेछन् । यस्तै वैज्ञानिक, अनुसन्धानकर्ता, इन्जिनियर, अन्तरिक्ष यात्री, साहसी सुरक्षाकर्मी, पर्वतारोही, सोलो ट्राभलर, राजनीतिज्ञ, कूटनीतिज्ञ पनि समावेश गरिनेछ ।

यसमा अमेरिका, युरोप, एसिया, अफ्रिका महादेशमा आफ्नै कर्मले चम्किएका नेपालीहरु उच्च प्राथमिकतामा पर्नेछन् । तर त्यसका लागि केही पृथक, आम नेपालीको हितमा गरिएको काम र आफ्नो पेशामा उत्कृष्ट योगदान दिएका नेपालीहरु पहिलो प्राथमिकतामा पर्नेछन् ।

यो सूचिमा सबैभन्दा बढी अमेरिका महादेशका ५० जना नेपाली डायस्पोराका व्यक्तित्व समावेश हुनेछन् । जुन उत्तर अमेरिका र दक्षिण अमेरिका दुवै महादेशका नेपाली डायस्पोराका व्यक्तित्व छनौट गरेर अमेरिकाका ५० जना उत्कृष्ट नेपालीका नामले सूचि प्रकाशित गरिनेछ ।

बाँकी ५० जना एसिया, युरोप, अफ्रिका र अष्ट्रेलिया महादेशमा रहेका नेपाली डायस्पोराका व्यक्तित्व हुनेछन् । 

‘बेस्ट अफ द बेस्ट’ अर्थात उत्कृष्ट नेपालीहरुमा पनि उत्कृष्ट भन्ने नाराका साथ सुरु गरिएको यो सूचिमा सबै क्षेत्रका व्यक्तित्वलाई समेट्ने प्रयास हुनेछ । ‘१०० नेपाली डायस्पोरा’ नामले नै प्रकाशित गर्न लागिएको यो सूचि यसपटक २५ वर्षयताका उत्कृष्ट तथा प्रभावशाली नेपालीहरुमा केन्द्रित हुनेछ ।

जसले वर्षौदेखि नेपालबाहिर बसेर आफू, आफ्नो देश र नेपालीहरुको सेवामा जीवन समर्पित गरेका छन् । अनि निरन्तर अन्तर्राष्ट्रिय मिडियाका हेडलाइन बनिरहेका छन् । यो सकारात्मक कदम उनीहरुको राम्रा कामको साक्षी र सफलताको सूचकका रुपमा रहिरहने हाम्रो विश्वास छ । 

यसपटक सन् २००० देखि २०२५ सम्मको अवधिमा चर्चा र लोकप्रियता हासिल गरेका व्यक्तित्व यो सूचिमा प्राथमिकताका साथ समावेश हुनेछन् । हरेक वर्ष प्रकाशित हुने यो सूचिले नेपाली डायस्पोराको संघर्ष, सफलता र सूचक मापन गर्नेछ भन्ने विश्वास छ । अनि संसारभर नेपालीहरु झन् धेरै विस्तार र व्यापक हुने विश्वास छ । जसले आफ्नै पौरखमा नेपाल र नेपालीको शीर सँधै उचो राख्ने हिम्मतलाई सदैव प्रोत्साहन गर्नेछ भन्ने विश्वास पनि छ ।

यो १०० जना प्रभावशाली सूचिमा १० जना नेपाली डायस्पोराका चर्चित, लोकप्रिय तथा प्रतिभाशाली लिजेन्ड पनि समावेश गरिनेछ । जसले नेपाली डायस्पोरामा गरेको योगदानको उच्च सम्मानका रुपमा इतिहास लेख्ने कामको नेतृत्व गर्नेछ ।

द इभरेष्ट इंकद्धारा सञ्चालित ‘१०० नेपाली डायस्पोरा’ले सञ्चालन गरेको यो सूचि अक्टोबरदेखि सुरु भएर डिसेम्बरमा सम्पन्न हुनेछ । डिसेम्बरमा पूरा सूचि प्रकाशित भएपछि उनीहरुलाई सम्भव भएसम्म एउटा विशेष कार्यक्रम गरेर नेपाली डायस्पोराका १०० जना प्रभावशाली व्यक्तित्व प्रमाणपत्र प्रदान गरिनेछ ।