१४ पटक अन्टार्टिका पुगेका नेपाली युवा

तपाईँले नेपाल घुम्नु भएकै छ होला । विदेशमा हुनुहुन्छ भने पक्कै अमेरिका, युरोप, अष्ट्रेलिया, अफ्रिका पनि घुम्नु भएकै होला । नेपाल र विदेशका महत्वपूर्ण ठाउँ घुमिसकेपछि तपाईँलाई अन्टार्टिका पुग्ने रहर पनि पक्कै होला । 

अन्टार्टिका विश्वको सातौँ महादेश हो, जहाँ अहिलेसम्म पनि मानवबस्ती छैन । हिँउ नै हिउँले भरिएको अन्टार्टिका पुग्ने नेपालीको संख्या दिनानु दिन बढ्दैछ । तर पनि त्यो औँलामै गन्न सकिने गरि सीमित छ । तर एक जना नेपाली युवा भने दुई वर्षमा १४ पटकसम्म अन्टार्टिका पुगिसकेका छन् । त्यो पनि निःशुल्क । 

एकपटक अन्टार्टिका जाँदा कम्तीमा पनि २५ देखि ३० लाख नेपाली रुपैँया लाग्छ । तर रोल्पा घर भएका महेन्द्र घर्ती मगर निःशुल्क १४ पटकसम्म अन्टार्टिका पुगेर फर्किसकेका छन् । सन् २०२३ देखि अमेरिकाको वाशिङ्टन डिसीमा मुख्यालय रहेको क्रुज (पर्यटक बोक्ने लक्जरी पानीजहाज)मा कार्यरत उनी भाग्यले १४ पटकसम्म अन्टार्टिका पुग्ने अवसर पाएका हुन् । 

क्रुजमै काम गरिरहँदा उनले झण्डै ५० अन्तर्राष्ट्रिय देश घुमिसकेका छन् । रोल्पाबाट दुबई पुगेर होटलमा काम गरेका उनी अमेरिका पुगेपछि होटलमै काम गरेपछि उनी क्रुज बारमा काम गर्छन् । यसले उनलाई लोभलाग्दो पारिश्रमिक र विश्व घुम्ने सुनौलो अवसर दिएको छ।

अन्टार्टिका पुग्ने पहिलो नेपाली भुवनसिंह विश्वकर्मा हुन् भने एनआरएनए पूर्वअध्यक्ष जीवा लामिछानेले अन्टार्टिका पुगेपछि लेखेको पुस्तक ‘अक्षत अन्टार्टिका’ प्रकाशित छ ।  

(सम्पादकीय नोट : ‘१०० नेपाली डायस्पोरा’ विदेशमा आफ्नो क्षेत्रमा उत्कृष्ट काम गरिरहेका प्रभावशाली नेपालीहरुको सूचि हो । हामी क्रमशः सबै क्षेत्रका उत्कृष्ट व्यक्तिहरुको १०० शब्दको छोटो परिचयसहितको व्यक्तित्व विवरण प्रकाशित गरिरहेका छौँ । पूरा सूचि सार्वजनिक गरेपछि उत्कृष्ट १० जनामध्येबाट एक जनालाई खुला भोटिङमार्फत ‘वर्ष व्यक्ति २०२५’ पनि घोषणा गर्नेछौँ ।)