युरोपकी पहिलो महिला ‘हेड शेफ’ 

महिलाहरुका लागि खाना पकाउनु नौलो कुरा होइन । त्यसमाथि नेपाली आमा, दिदीबहिनीले पकाएको खानाले संसारभर नेपाली माया, संस्कार, संस्कृति र खाद्य पर्यटनको प्रवर्द्धन गरेको छ । तर नेपाली भान्छाबाट संघर्ष गर्दै नेपालकै विश्वविद्यालयबाट डिग्री हासिल गरेर युरोपकै पहिलो महिला ‘हेड शेफ’ बन्न सफल छिन्, गोमा पौडेल ।

२० वर्षअघि बेलायत पुगेकी पौडेल खाना पकाउन जति पोख्त छिन, सामाजिक रुपमा त्यति नै सक्रिय र सहयोगी हुन् । सुरु सुरुमा संघर्ष गर्दै विभिन्न रेष्टुरेन्टमा काम गरेर ‘किचेन क्याबिनेट’ सम्हालेकी गोमाले अहिले बेलायतका विभिन्न ठाउँमा आधा दर्जन रेष्टुरेन्ट सञ्चालनमा ल्याएकी छन् । 

आफैलै तीन वटा रेष्टुरेन्ट सञ्चालन गरेकी उनले अन्य रेष्टुरेन्ट र हस्पिटालिटी क्षेत्रमा लगानीसमेत गरेकी छन् । हाम्रो नेपाली समाज मिडल्याण्डकी पूर्वअध्यक्षसमेत रहेकी पौडेल गैरआवासीय नेपाली संघ, युकेमा बसेर नेपाली समुदायलाई सहयोग गरेकी छन् ।

कोभिड महामारीका बेला उनले बेलायतमा रहेका विद्यार्थीलाई गरेको सहयोग र फैलाएको सहयोगी हात नेपाली डायस्पोरामा गोमा पौडेल नामले चर्चित बनाएको हो । उनले काठमाडौँमा रहेको मानव सेवा आश्रममा पनि विभिन्न समयमा सहयोग गरेकी छन् । 

स्रोत : नेपाल ब्रिटेन डटकम

(सम्पादकीय नोट : ‘१०० नेपाली डायस्पोरा’ विदेशमा आफ्नो क्षेत्रमा उत्कृष्ट काम गरिरहेका प्रभावशाली नेपालीहरुको सूचि हो । १०० शब्दको छोटो परिचयसहितको व्यक्तित्व विवरण हामी क्रमशः प्रकाशित गरिरहेका छौँ । पूरा सूचि सार्वजनिक गरेपछि उत्कृष्ट १० जनामध्येबाट एक जनालाई खुला भोटिङमार्फत ‘वर्ष व्यक्ति २०२५’ पनि घोषणा गर्नेछौँ ।)