ट्रक चलाउँदै युरोप घुमिरहेका आशिष

एउटा फकिर जीन्दगी । जो ट्रक चलाउँछन् । ट्रकमै सुत्छन् । ट्रकमै खान्छन् । अनि ट्रक चलाएरै जीन्दगी चलाउँछन् । उनी ट्रक चलाउँछन् । ट्रकले उनको जीन्दगी चलाइरहेको छ, त्यो पनि महंगो युरोपमा ।

उनी कहिले स्पेन पुग्छन्, कहिले पोर्चुगल । कहिले बेलायत त कहिले फ्रान्स पुगेर उनी युरोपका महंगो गन्तव्यमा सजिलै पुगिरहेका हुन्छन् । उनी युरोपका देश हुँदै कतार, दुबई हुँदै भारतसम्म पुगिरहेका हुन्छन् । यसरी हेर्दा उनी ट्रकमै युरोप हुँदै एसियाका पनि ठूला देशहरु घुमिरहेका छन् ।

यो काम सजिलो छ । तर सोचेजति सजिलो पनि छैन । कहाँनेर कतिबेला कस्तो अफ्ठ्यारो आउँछ ? कसैलाई पत्तो हुँदैन । तर एक जना नेपाली युवा, जो ट्रक चलाएरै पुरै युरोप घुमिरहेका छन् । 

बाग्लुङका आशिष बिसी अहिले युरोपमा ट्रक चलाउँछन् । ठूलो ट्रकको स्टेरिङमा हात राखेर जसरी उनले मोड्दै, घुमाउँदै चलाउँछन्, त्यसैगरी युरोपमा आफ्नो लोभलाग्दो जीन्दगी घुमाइरहेका छन् ।

उनी ट्रक चलाउँछन्, ट्रक चलाएर जहाँ जहाँ पुग्छन्, त्यहाँ त्यहाँको भ्लग बनाउँछन् । फेसबुक, युट्युब र इन्स्टाग्राममा रील हाल्छन् । यसले उनको फ्यान फ्लोइङ बढेको छ । अनि युरोपको ताजा घटनाक्रम र ट्रक ड्राइभरको जीन्दगी पनि साझा गरिरहेका छन् । यसले उनको यात्रा रमाइलो मात्रै भएको छैन, पूरै युरोप घुम्ने सपना पनि पूरा गरिरहेको छ । 

भनिन्छ, कुनै पनि काम गरेपछि पुरा दिल लगाएर गर्नुपर्छ । जसले गर्दा त्यो कामले तपाईलाई खुशी दिलाओस् । विदेशमा धेरै नेपाली धेरै पैँसा कमाएर पनि सुन्तष्ट छैनन् । तर उनको ट्रक चलाउने ‘हेभी ड्राइभर’ पेशाबाट सिक्न जरुरी छ, जुन काम गरिन्छ, त्यसमा रमाउन सक्नुपर्छ । सन्तुष्ट हुनुपर्छ । त्यसैले खुशी अरुमा होइन, आफूमा खोज्नुपर्छ । आफैँ खुशी हुनुपर्छ ।

तपाईको खुशीले अरुलाई पनि खुशी दिन सक्छ । आशिषका फेसबुक रीलहरुले धेरैलाई खुशी र सन्तुष्ट दिइरहेको छ । एक जना यस्ता नेपाली जो, ट्रक चलाएरै संसारकै महंगो युरोप टूरलाई सहज र सस्तो बनाइरहेका छन् ।  

त्यसमाथि ‘के छ खबर, सन्चै हुनुहुन्छ नि है’ भन्दै उनले ट्रक गुडिरहेको सडकको दृश्यसहितको रील हाल्दा त मन प्रफूल्ल हुन्छ । विदेशमा मानिसहरु अर्बौ महंगो मूल्यको कम्पनीको काम गरेर महिनामा लाखौँ कमाउँदा पनि खुशी र सन्तुष्ट देखिएका छैनन्, तर उनी ट्रकमै खुशी देखिन्छन् । यो उनको खुबी हो ।

नेपालमा छँदा गायनमा पनि सक्रिय रहेका उनी युरोपमा पनि ‘ट्रक ड्राइभर’ जीन्दगीको गाडी गुडाउँदै नेपाल तथा विदेशका लाखौँ नेपालीहरुसँग डिजिटल रुपमा ‘इन्ट्राक्ट’ भइरहेका छन् ।

(सम्पादकीय नोट : ‘१०० नेपाली डायस्पोरा’ विदेशमा आफ्नो क्षेत्रमा उत्कृष्ट काम गरिरहेका प्रभावशाली नेपालीहरुको सूचि हो । १०० शब्दको छोटो परिचयसहितको व्यक्तित्व विवरण हामी क्रमशः प्रकाशित गरिरहेका छौँ । पूरा सूचि सार्वजनिक गरेपछि उत्कृष्ट १० जनामध्येबाट एक जनालाई खुला भोटिङमार्फत ‘वर्ष व्यक्ति २०२५’ पनि घोषणा गर्नेछौँ ।)