जापानका नेपाली तरकारीवाला

कृषि पेशा र व्यवसाय नेपालमा मात्रै होइन । विदेशमा रहेका नेपाली पनि बिस्तारै कृषिमा मनग्य आम्दानी गर्दै नामी भइरहेका छन् । विदेशमा कृषि पेशा र व्यवसाय गरेर जमेका व्यक्ति हुन्, जापानमा रहेका प्रदीप थापा । 

जसले नेपाली शैलीमै तरकारी व्यवसाय गरेर जापानमा करोडौँ कारोबार गर्दै आएका छन् । जापानको टोकियोमा सुरुमा स्टोर खोलेका उनले बिस्तारै आफैले तरकारी व्यवसाय गदैै त्यसलाई ठूलो मात्रामा फैलाएका छन् । 

लामो समय जापानीज कम्पनी र व्यवसायीसँग काम गरेर सीप सिकेका उनले अहिले आफूले व्यवसाय बिस्तार गर्दै पाँच वटा स्टोर खोल्न सफल भएका छन् ।

सन् १९९७ मा जापान पुगेका उनी झण्डै १५ वर्ष संघर्ष गरेपश्चात अहिले आफ्नै स्टोर र कृषि व्यवसायमार्फत लाखौँ करोडौँको कारोबार गरिरहेका हुन् ।

जापानमा रहेका नेपालीलाई उनले फर्सीका मुन्टा, लौका, चिचिन्डो, फर्सी, घिरौँला लगायत नेपाली तरकारी खुवाउँदै आएका छन् । जापानमा नेपालसहित दक्षिण एसियाली नागरिकलाई नेपाली तरकारी फलाउँदै र खुवाउँदै आएका प्रदीप पछिल्लो समय विश्वभर रहेका नेपालीमाझ पनि चाँसो र चर्चाका पात्र बनिरहेका छन् ।