विदेशमा नेपाली भाषा सिकाउने ‘लिपीमाला’

पछिल्लो समय विदेश बस्ने नेपालीहरुको संख्या बढ्दो छ । विदेश बसेकाहरुको छोराछोरी जन्मिएर विदेशमै हुर्किने र पढ्ने गरेका छन् । जसकारण उनीहरु नेपाली भाषाभन्दा बढी विदेशी भाषामै कुराकानी गर्छन् । जसले गर्दा नेपाली भाषा सिक्न उनीहरुलाई असहज भइरहेको छ ।

यस्तो अवस्थालाई नजिकबाट देखेका अष्ट्रेलिया बस्ने आइटी इन्जिनियर किरण अधिकारीले ‘लिपीमाला’ एप बनाएका छन् । मोबाइल र कम्प्युटरमा खुल्ने यो एपबाट नेपाली भाषा सिक्न र सिकाउन सहज छ ।

जसले गर्दा विदेश बसेका नेपालीहरुलाई नेपाली बोल्न, लेख्न, सिक्न र सिकाउन सहज भइरहेको छ । यसै वर्ष सार्वजनिक भएको यो एपबाट नेपाली डायस्पोरामा किरण अधिकारीले केही फरक परिचय बनाइरहेका छन् ।

स–साना बालबालिकादेखि बुढाबुढीसम्मलाई नेपाली भाषा सिक्न र सिकाउन यो एप उपयोगी देखिएको छ । विदेशमा बस्ने सबैजसो सजिलै इन्टरनेटको पहुँचमा हुने तर नेपाली भाषा सिक्ने पर्याप्त नेपाली प्लार्टफर्म नहुँदा सुरुमा असजिलो हुने गरेको थियो ।

जसलाई किरणले सहजैसँग समाधानको उपाय ल्याएका छन् । इन्टरनेटमा सजिलै खोज्न, मोबाइलमा डाउनलोड गर्न मिल्ने र आफैँले नेपाली भाषा राम्रोसँग सिक्न सकिने भएकाले पनि यो एप उपयोगी देखिएको छ ।

यो एपले संसारभर रहेका नेपाली भाषी समूदायलाई थप नेपाली भाषा, संस्कृति र शब्दमा गहिरोसँग जोड्ने अपेक्षा गरिएको छ ।