इंग्ल्याण्डमा नेपाली मूलकी पहिलो फूटबलर

इंग्ल्याण्डमा नेपाली मूलकी पहिलो फूटबलरका रुपमा अस्मिता आलेले इतिहास रचेकी छन् । बेलायती लाहुरेकी छोरीका रुपमा अस्मिताले इंग्ल्याण्डको युवा उमेर समूह टिम र इंग्ल्याण्डको चर्चित वुमन प्रिमियर लिग खेल्दै इतिहास रच्न सफल भएकी छन् । इंग्ल्याण्डमा पुरुषहरुले खेल्ने प्रिमियर लिग हुँदा महिलाहरुको लिगलाई वुमन सुपर लिग भनिन्छ ।

तनहुँको दमौली घर भएका अमृत आले र बसन्ती आलेकी छोरी अस्मिताले १६ वर्षकै उमेरमा इंग्ल्याण्डको १७ वर्षमूनिको टिमबाट फूटबल खेलेकी थिइन् । ७ वर्षकै उमेरमा फूटबल खेल्न थालेकी उनी क्षमतावान भएकै कारण इंग्ल्याण्डको उमेर समूहको टिममा छनौट भएकी थिइन् । त्यसपछि उनले क्रमशः १८ वर्षमूनि र १९ वर्षमूनिको टिमबाट पनि खेलिन् ।

जब उनी १८ वर्ष उमेर पुगिन् । त्यसपछि इंग्ल्याण्डका चर्चित एस्टन भिल्ला र टोटेनह्याम टिमबाट खेल्न थालिन् । खासगरि टोटेनहमले उनलाई आफ्नो टिममा ल्याएपछि उनको चर्चा राष्ट्रिय तथा अन्तर्राष्ट्रिय क्षेत्रमा चुलिएको थियो ।

उनी इंग्ल्याण्डको महिला फूटबल लिग अर्थात वुमन सुपर लिग खेल्ने पहिलो दक्षिण एसियाली महिला फूटबलर हुन् । उनी विश्वकै चर्चित लिग खेल्न थालेपछि स्काई स्पोट्स र बीबीसीले समेत अन्तर्वार्ता लिएर इंग्ल्याण्डमा फूटबल लिग खेल्ने पहिलो नेपाली मूलकी फूटबलर भनेर फिचरिङ गरेका थिए ।

पछिल्लो समय उनी लेस्टर सिटीबाट लिग खेलिरहेकी छन् ।