जेनजीले ४८ घण्टामै पल्टाएको नेपाली राजनीतिको पासा 

कोलोराडो, अमेरिका : १५ देखि ३० वर्षका युवाहरुले दुई दिनमा नेपाली राजनीतिको पासा पल्टाएका छन् । सेप्टेम्बर ८ र ९ नेपाली युवाहरुले नेपाली राजनीतिको पासा पल्टाउँदा ४८ घण्टाभित्र के–के भयो ? कसरी भयो ? १० हाइलाइट्समा हेरौँः

१. सेप्टेम्बर ८, बिहान ९ बजे : नेपालमा जेनजीद्धारा शान्तिपूर्ण आन्दोलनको घोषणा । इण्डोनेसियाबाट प्रभावित । जसको नेता थिएन । स्वस्फूर्त परिचालन । हजारौँको सहभागिता ।

२. माइतीघरबाट सुरु भएको आन्दोलन नयाँ बानेश्वरसम्म शान्तिपूर्ण । केही बेरमा झडप । जेनजी संसद छिर्न खोज्दा प्रहरीले गोली चलायो । १९ जना मारिए ।

३. पहिलो दिन शान्तिपूर्ण भनिएको आन्दोलन रक्ताम्मे बन्यो । १९ जना मारिए । तीन सय बढी घाइते । यो घटनाले नेपालदेखि विदेशसम्म सबैलाई रुवायो ।

४. मध्यराती बसेको मन्त्रिपरिषद् बैठकमा गृहमन्त्री रमेश लेखकले राजीनामा दिए । प्रधानमन्त्री केपी ओली चुप बसे । सञ्चारमन्त्री पृथ्वीसुब्बा गुरुङले फेसबुक खोलेको घोषणा गरे । अब कसैले राजीनामा नदिने अडान राखे ।

५. सेप्टेम्बर ९ : दोस्रो दिन बिहान ७ बजेदेखि नै नयाँ बानेश्वरमा जेनजी भेला भए, जो मारिएका थिए, उनीहरुका अभिभावक पनि । उनीहरुका कैयौँ साथी आफ्नै अगाडि ढलेका थिए । उनीहरुको आक्रोशको सीमा रहेन ।

६. अनि सुरु गरे, उनीहरुले आन्दोलन । सुरुमा नयाँ बानेश्वरबाट संसद भवन भित्र छिरे । त्यहाँ आगो लाग्यो । सिंहदरबार छिरे, त्यहाँ आगो लाग्यो । सर्वोच्च छिरे, त्यहाँ पनि आगो लाग्यो ।

७. यो क्षति बढ्दै जाँदा कांग्रेसबाट गगन थापा र विश्वप्रकाशको विज्ञप्ती आयो । कांग्रेसका मन्त्रीले राजीनामा गरे । प्रधानमन्त्रीले सर्वदलीय बैठक बोलाए । तर सबैले उनकै राजीनामा मागे ।

८. आक्रोशित युवाले जलाउँदै गए । संसद, सर्वोच्च र सिंहदरबार जल्यो । शीतलनिवास पनि आगो लगाएँ । यो बीचमा रास्वापाका सबै सांसदले राजीनामा गरे । एमालेका धेरै नेताले पद त्यागे । जेनजी युवाहरुले प्रचण्ड निवास खुमलटार, देउवा निवास बुढानिलकण्ठ र ओली निवास बालकोट जलाइसकेका थिए । देउवा र उनकी पत्नी आरजुलाई पनि कुटपिट गरेर सेनाको जिम्मा लगाए ।

९. ओलीले अन्तिम अस्त्रका रुपमा सेना प्रमुख अशोक सिग्देलसँग सहयोग मागे । उल्टै ‘जनता मारेर नेताका घर जोगाउन सकिदैन’ भन्ने जवाफ पाएपछि ओलीले पदबाट राजीनामा दिए । र, सेनाको हेलिकोप्टर चढेर भागे । यसबीचमा एमालेका धेरै पार्टी कार्यालयहरु जलाइए ।

१०. ओलीको राजीनामा आएपछि बालेनको स्टाट्स आयो, जेनजीलाई आन्दोलन रोक्न आग्रह गरे । ओली भागेको, सत्ता ढलेको र युवाको नेतृत्व सुनिश्चित भएको संकेत गरे । सेना प्रमुखसँग वार्ताका लागि तयार रहन भन्दै उनले संसद विघटन हुुनुपर्ने माग राखे । सोहीअनुसार सेना प्रमुखले सम्बोधन गर्ने कार्यक्रम छ । त्यसको केहीबेरमा राष्ट्रपतिले सर्वदलीय र सर्वपक्षीय वार्ताको आह्वान गरेका छन् । सम्भवतः बालेनलाई अन्तरिम सरकारको नेतृत्व दिएर चुनावमा जानेबारे तयारी चलिरहेको छ ।

ओलीको राजीनामापछि सबै पक्षले आक्रमण तथा आगजनी रोक्न जेनजीलाई आग्रह गरेका छन् । जेनजीका देखिएका संयोजक सुदन गुरुङले पनि अब जित भएको भन्दै आक्रामण रोक्न भनेका छन् । ओलीको सत्ता ढालेर भगाएपछि जेनजी र देश विदेशमा रहेका सबै खुशी भएका छन् । आन्दोलनमा जो जो मारिएका छन्, जुन जनधनको क्षति भएको छ । यसले ठूलो मूल्य चुकाएको छ । क्षतिको हिसाब आउँला । अहिलेलाई संयम बनौँ, शहिदलाई सलाम र श्रद्धाञ्जली । घाइतेको निःशुल्क उपचार गरौँ ।

भ्रष्टाचारको जालो, ओली–प्रचण्ड–देउवाको आलोपालो र तीन दलको मात्रै राजनीतिक टालो जेनजी युवाले ४८ घण्टामा च्यातचुत पारेका छन् । यसका लागि सलाम । यो आन्दोलन, यो घटना र यो बलिदान नेपाली इतिहासमा स्वर्णिम अक्षरले लेखिनेछ । समय लाग्यो । क्षति भयो । धेरै ठूलो क्षति भयो । तर देशको राजनीतिक मुहार जेनजीले आफ्नै साथीहरुको बलिदान दिएर फेरिदिएको छ ।