जेनजी आन्दोलनले ल्याएको क्रान्तिपछि बुझ्नैपर्ने ५ कुरा

खास युवाले गरेको आन्दोलन र क्रान्तिले यतिबेला नेपाल नयाँ बाटोमा अघि बढ्दैछ । एक किसीमले संक्रमणकालबाट गुज्रिरहेको छ । तर केही हल्ला, भ्रम र वाहियात खराब चिन्ताहरु प्रकट भइरहेका छन् । त्यसमाथि हिजो फेसबुक चलाउनै नदिनेहरु अहिले फेसबुकमै गोहीका आँशु झार्दै रोइलो गरिरहेका छन् । केही समय धेर्य गरौँ, शान्त बनौँ, आशावादी बनौँ र बोल्नुभन्दा अगाडि सुनौँ । समस्या छ, समाधान पनि निस्कदैछ, तर यी पाँच कुरा मनन गर्नैपर्छ ।

१. नयाँ संविधान, संघीयता र गणतन्त्र 

हिजो रातो, तातो क्रान्ति गरेर रगतकै बलिदान दिएर लेखिएको नयाँ संविधान, त्यही संविधानले आएको संघीयता र गणतन्त्र दुरुस्तै छ । यो व्यवस्था कसैले खोस्न सक्दैन । कसैले खोस्ने वा हल्लाउने आँट नगरे पनि हुन्छ । सुरुमा राम्रो तर अहिलेका सबैभन्दा खराबपात्र प्रचण्ड, अनि ओली र देउवा जबर्जस्त बहिर्गमन जेनजी युवाले गरेका छन् । अब कम्तीमा उनीहरु प्रधानमन्त्री बन्ने छैनन् ।

माओवादी, एमाले र कांग्रेसमा अब नयाँ पुस्ताका नेताहरु आउनेछन् । पार्टीभित्रको लोकतन्त्र पुनर्जिवित हुँदैछ, नभए यी पार्टी जनताबाटै आगामी चुनावमा बढारिन्छन् । यसमा शंका होइन, विश्वास गरौँ ।

२. सेनाको कू वा राजा आउने हल्ला 

पछिल्लो केही घण्टा यता देशमा सेनाले सत्ता हातमा लिदैछ भन्ने हल्ला व्यापक चलाइएको छ । फेरि सेनाकै बलमा राजा आउने पनि चर्चा हुँदैछ । यी सबै कुरा भ्रम हुन् । यदि सेना वा राजाले त्यो दुस्साहस गरे भने उनीहरुका लागि सबैभन्दा खराब परिणाम हुनेछ । नेपाली युवाहरुले संसारभर वीर गार्खाली सेना भनेर दोस्रो विश्वयुद्धदेखि नै हिम्मत पुष्टि गरिरहेका छन् । अहिले तिनै युवाहरु पहिलोपटक आफ्नो देशको मुहार फेर्न छातीमा गोली खाएर, गोली खान तयार भएर नेपाली राजनीतिको मैदानमा छन् ।

यिनीहरुलाई धेरै कुरा थाहा नहोला, तर एउटा कुरा थाहा छ, अब यो वा त्यो बाहनामा एमाले, माओवादी र कांग्रेसको सिण्डिकेट चल्दैन, कसैको पनि मनोमानी स्वीकार छैन । ओली, देउवा र प्रचण्डको पतन भइसकेको छ । अब अन्तरिम सरकार गठन गरेर देशलाई चुनावमा लगेर नयाँ जनादेश अनुसार स्थायित्व खोज्ने अनि त्यसैको बलमा देशमा सुशासन ल्याउन प्रतिबद्ध छ । यसमा विश्वास गरौँ । यदि केही गरि सेनाले कु गरिहाल्यो र राजा आइहाले पनि त्यसको आयु लामो हुँदैन । यसलाई विश्वास नै नगरौँ ।

३. एमाले, कांग्रेस र माओवादी कार्यकर्ताको छटपटी र हल्लाको खेती

लोकतन्त्र वा गणतन्त्रमा जनताबाट निर्वाचित दल वा पार्टी नै मुख्य विकल्प हो । तर भ्रष्टाचार, सत्ताको दुरुपयोग, पैँसाको लोभमा पल्केका र जनतामाथि निरन्तर अपराध गरिरहेका कांग्रेस, एमाले र माओवादीको राजनीतिक धरातल अब जराबाटै हल्लिएको छ । अबको चुनावमा यी पार्टीहरुलाई आफ्नो कार्यकर्ता जोगाउनै हम्मेहम्मे हुन सक्छ ।

तर उनीहरु आफ्नो सत्ता र मनोमानी खोसिएपछि हिजो आफैँले प्रतिबन्ध लगाएको फेसबुकमा  ‘सेनाले सत्ता हातमा लिने, फेरि राजा ल्याउने, ओली, प्रचण्ड र देउवालाई नजरबन्दमा राखेको र विदेशीको इशारामा नेपालको सत्ता पल्टाउने आन्दोलन गराइएको, सिंहदरबार, सर्वोच्च र संसद् विदेशकै निर्देशनमा जलाइएको भन्ने हल्ला, भ्रम र अफवाह’ चलाइरहेका छन् । बिपीकै शब्दमा संसारकै सबैभन्दा खराब र दास कार्यकर्ता भएकै कारण देश भ्रष्टाचारको चंगुलमा चुर्लुम्म डुबेरै आज जेनजीले शान्तिपूर्ण भनेर बाध्यतात्मक रुपमा तोडफोडसहितको आन्दोलन गरेर भ्रष्टाचार सत्ताको पासा पल्टाएको हो ।

यी पार्टीका नेता, कार्यकर्ता र पत्रकारले यो हल्ला फैलाएर जेनजी आन्दोलन कमजोर बनाउन खोज्दैछन् । यिनीहरुलाई भन्न सकौँ, ‘तिमी भ्रष्टाचार गर्ने पार्टीको बफादार कार्यकर्ता हौँ । अब चुप लाग ।’ अर्को कुरा नेपालमा स्वतन्त्र पत्रकार कम, पार्टीगत पत्रकार धेरै छन् । तीन ठूला पार्टीका धेरै नेताहरुको खास पत्रकार पनि यतिबेला सही सूचना दिनेभन्दा भ्रमपूर्ण सूचनाहरु फेसबुकमा लेखिरहेका छन् । 

४. अन्तरिम सरकार : बालेन र शुशिला कार्कीको कुरा 

'हामी नेपाल' अभियानका संस्थापक तथा अध्यक्ष सुदन गुरुङको नेतृत्वमा भएको जेनजी आन्दोलनकै वरिपरी नेपालको नयाँ राजनीति घुमिरहेको छ । उनीहरुले आन्दोलन सुरु गरेदेखि अहिलेसम्म खासगरि सुदनकै वरिपरि अहिलेका सबै निर्णय भइरहेका छन् । यो पुस्ताको नेतृत्व सुदन भएपनि उनीहरुका सबैभन्दा ठूला ‘आइडल’ वा ‘सुप्रिम लिडर’ बालेन हुन् ।

किनकी नेपालका तीन ठूला पार्टीविरुद्ध पहिलोपटक लडाई लडिरहेका बालेन हुन् । उनले जित्नै नसक्ने भनिएको चुनाव जितेर काठमाडौँ महानगरपालिका चलाइरहेका छन् । र, पछिल्लो तीन वर्षदेखि राम्रैसँग महानगर चलाइरहेका छन् । तर ओलीले उनलाई काम गर्न अवरोध गरेको गर्यै भए । अहिले बालेनकै पक्षमा जेनजी उभियो । र, बालेनले पनि सुरुदेखि जेनजी आन्दोलनलाई मार्गनिर्देश दिइरहेका छन् ।जेनजी र बालेनकै योजनाअनुसार यो नसोचिएको अवस्थालाई नियन्त्रणमा ल्याउन सेनाको सहयोग लिइएको हो ।

संवैधानिक राष्ट्रपति, सेना र जेनजीले संयुक्त रुपमा अन्तरिम सरकारको प्रधानमन्त्री छान्दैछन् । सम्भवतः बालेनको समर्थनमा शुशिला कार्की चुनावी सरकारको प्रधानमन्त्री बन्दा धेरै कुरा कानुनी रुपमा पनि हल गर्न सहज हुन्छ । किनकी कांग्रेस, एमाले र माओवादीले देश र जनताका लागि भन्दा आफ्नो राजनीतिक स्वार्थका लागि ‘लूप होल’ राखेर संविधान जारी गरेका हुन् ।

त्यसैले जेनजी र बालेनले भनेअनुसार कम्तीमा पाँच महिना वा एक वर्षभित्र शुशिला कार्की प्रधानमन्त्री बनेर चुनाव गर्दा दलीय सिण्डिकेट तोडेर नयाँ, सक्षम, पढेलेखेका र देशमा केही गरौँ भन्ने हुटहुटी भएका बालेन, हर्क र गोपी हमाल जस्ता सयौँ योग्य सांसदहरुले पाँच वर्ष देशलाई स्थायित्व दिन सक्छन् । नेपाललाई चाहिएको पनि यही हो । यो हुँदा पार्टीको झोले कार्यकर्ताको योग्यता र दलाली कम्तीमा रोकिन्छ ।

५. सही सुचना, आधिकारिक समाचार र तथ्य मात्रै हेरौँ, सुनौँ र सुनाऔँ

यस्तो संक्रमणको बेला सबैभन्दा धेरै हल्ला, चिन्ता र झूट समाचार फैलिन्छन् । अहिले पनि त्यही भइरहेको छ । कृपया यस्तो बेला सही सूचना र समाचार मात्रै लेखौँ, पढौँ र पछ्याऔँ । यस्तो बेला धेरैले सुनेका र मनमा लागेका सबै हल्ला फेसबुकमा लेखेर आफ्नो फेसबुक लगायत समाजिक सञ्जालमा ‘फ्लोअर्स’ बढाउने होडबाजी चलाउँछन् । सतर्क बनौँ । आधिकारिक मिडियाका मात्रै सूचना र समाचार पढौँ ।

यसले तपाईँलाई सकारात्मक रहन सहयोग गर्छ । अर्को महत्वपूर्ण कुरा सकारात्मक सोचौँ, सकारात्मक बनौँ, आशावादी रहौँ । किनभने सबैभन्दा राम्रो समय आउन सबैभन्दा खराब भन्दा खराब समयको सामना गर्नैपर्छ, त्यसको विकल्प छैन । त्यसमाथि वर्षौदेखिका खराब पात्र र प्रवृत्ति हटाउन सहजै सजिलो नहुन सक्छ । तर समय लाग्छ, सबथोक राम्रो हुँदै जान्छ ।