अर्जुन बगालेको पहलमा अमेरिकाका नेपाली एकजुट 

कोलोराडो : अमेरिका निवासी नेपालीहरु नेपालको पछिल्लो अवस्थामा आवश्यक सहयोग गर्न एकजुट भएका छन् । कोलोराडो निवासी समाजसेवी अर्जुन बगालेको महत्वपूर्ण पहल तथा समन्वयमा अमेरिकाका अगुवाहरु नेपाललाई आवश्यक सहयोग गर्न तयार तथा एकजुट भएका हुन् ।

रक्की माउन्टेन फ्रेन्ड्स अफ नेपाल (आरएमएफएन)का निवर्तमान अध्यक्ष बगालेको आयोजनामा मंगलबार भएको भर्चुअल जुम बैठकमा सहभागी ३० जना भन्दा धेरै कोलोराडो निवासी अगुवा, समाजसेवी, साहित्यकार र युवाहरुले नेपालको पछिल्लो राजनीतिक परिवर्तनमा आवश्यक साथ दिन र चाहिएको सहयोग गर्न तयार रहेको निष्कर्ष निकालेको हो ।

नेपालमा १३ देखि २८ वर्षमूनिका (जेन–जी’ युवाहरुले ४८ घण्टाभित्र गरेको ऐतिहासिक राजनीतिक क्रान्तिलाई साथ दिन र देशको अवस्था सुधार्न र आन्दोलनमा भएको भौतिक संरचनाहरुको क्षति पुनर्निर्माणका लागि नेपाली डायस्पोराको भूमिका के–कस्तो हुनुपर्ला ? भन्ने विषयमा आयोजित भर्चुअल जुम बैठकमा सहभागी सबैले सकारात्मक र यो ऐतिहासिक राजनीतिमा परिवर्तनमा एकसाथ रहनुपर्नेमा जोड दिएका थिए ।

भर्चुअल जुम बैठकमा बोल्दै कोलोराडो निवासी विद्दान प्रा.डा.विजय शर्माले नेपाली युवाहरुले देखाएको साहस र ४८ घण्टाभित्र गरेको राजनीतिक परिवर्तन तथा क्रान्तिमा नेपाली डायस्पोराका सबै नेपाली तथा सामाजिक संघ संस्थाहरु एक ठाउँमा आएर सहयोग गर्नुपर्ने बताए ।

अहिले आगामी बाटोका लागि नेपालमा आन्दोलित युवा, नागरिक समाज र परिवर्तनका नेतृत्वकर्ताहरु एक ठाउँमा आएर राजनीतिक निकास निकाल्ने काम भइरहेकाले त्यसलाई नजिकबाट नियाल्दै देशलाई चाहिएको आवश्यक सहयोगका लागि कोलोराडोका सबै नेपालीहरु एक ठाउँमा उभिएर सहयोग गर्नुपर्ने प्रा.डा.शर्माको भनाई थियो ।

‘नेपालमा रहेका जेनजी युवाहरुले ठूलो राजनीतिक परिवर्तन र क्रान्ति गरेका छन् । यो नेपाल र हामी नेपाली डायस्पोराका लागि ठूलो परिवर्तनको आशा हो’ प्रा.डा.शर्माले जुम बैठकमा भने, ‘अब देशलाई चाहिएको आवश्यक सहयोग गर्न हामी सबै तयार हुनुपर्छ । देशले हामीबाट अपेक्षा गरेको र चाहिने सहयोग गर्न कम्तीमा कोलोराडो अमेरिकाका सबै नेपाली, संघ संस्था, त्यसका प्रमुख तथा प्रतिनिधि एक ठाउँमा आएर सहयोग गर्नुपर्छ ।’ 

साथै उनले देशको यो विषम परिस्थितीमा डायस्पोरामा रहेका नेपालीहरुले एकता, भ्रातृत्व र सहयोगी भूमिका निर्वाह गर्न सबैले आफ्नो ठाउँबाट अगाडि सर्नुपर्नेमा पनि जोड दिए ।

यस्तै कोलोराडो अमेरिकाका अगुवा साहित्यकार पदम विश्वकर्माले नेपाल जेनजी युवाहरुको साहसिक आन्दोलनले परिवर्तनको नयाँ मोडमा पुगेको टिप्पणी गरे । विगतमा वर्षौदेखि राजनीतिक दलका नेताहरुले आफू अनुकूलको भ्रष्टाचार तथा मनोमानी राजनीति गरेकाले त्यसको जरैदेखि निर्मूल पार्ने काम युवाहरुको आन्दोलनले गरेको भन्दै प्रशंसा गरे ।

‘यो नेपाली युवाहरुले देखाएको ठूलो साहस हो । ठूलो परिवर्तन हो । कम्तीमा नेपालमा अब भ्रष्टाचार धेरै हदसम्म रोकिने क्रान्ति नै हो’ उनले जुम बैठकमा टिप्पणी गर्दै भने, ‘अब जुन क्षति भएको छ, त्यसको पुनर्निर्माणमा हामी डायस्पोराका नेपालीहरुको सहयोग चाहिन्छ । त्यसका लागि तयार रहनुपर्छ ।’ साथै उनले अहिल्यै सहयोग गर्न हतार गर्नुभन्दा पर्ख र हेरको अवस्थामा देशले मागेको बेला नेपाली डायस्पोराले देखिने गरि आवश्यक आर्थिक सहयोग गर्नुपनेृ पनि औल्याए ।

जुम बैठकमा सहभागी भएका वक्ताहरुको प्रतिनिधिमूलक फोटो

यस्तै कोलोराडोका सक्रिय युवा व्यवसायी तथा चिकित्सक डा.सन्तोष उपाध्यायले जुम बैठकमा जेनजी युवाहरुको आन्दोलनले ल्याएको राजनीतिक परिवर्तन, नेपालको वर्तमान अवस्था र त्यसले निम्त्याएको क्षतिको बारेमा संक्षिप्त बिफ्रिङ गरेका थिए । आन्दोलनले ठूलो परिवर्तन ल्याएपनि नेपालका ऐतिहासिक प्रशासनिक तथा महत्वपूर्ण संरचनामा क्षति पुगेको भन्दै उनले दुःख व्यक्त गरे । 

आन्दोलित युवाहरुको आगजनीले संसद भवन, ऐतिहासिक सिंहदरबार र सर्वोच्च अदालतमा पुगेको क्षतिको मूल्यांकन गर्न कठिन रहेको बताए । यद्यपी अस्पताल, विश्वविद्यालय र पुरातत्व भवन तथा डाटा सेन्टरहरुमा संयम अपनाएको भन्दै उनले राहतको महसुस भएको टिप्पणी गरे । आन्दोलनमा भएका घाइतेहरुको उपचार गरिरहँदा चिकित्सकहरुमाथि धरपकड गर्ने, अस्पतालमै अश्रग्यास हान्ने तथा इमर्जेन्सीमा पसेर आतंकित पार्ने केपी ओली नेतृत्वको सरकार र प्रहरीको चरम दमनप्रति डा.उपाध्यायले आपत्ति जनाए ।

‘अहिले मात्रै होइन, नेपालको पछिल्लो १० वर्षदेखि ओली नेतृत्वको सरकारले गरेको मनोमानी, सत्ताको चरम दुरुपयोग र सुरक्षा प्रशासनलाई आफ्नो घमण्डले चलाउने प्रवृत्तिले नै अहिलेको अवस्था निम्त्याएको हो’ उनले जुम बैठकमा भने ‘युवाहरुले ओलीको त्यही घमण्ड, दम्भ, सत्ताको दुरुपयोग गर्ने नेता र शासकको अन्त्य गरेका छन् । जुन क्षति भएको छ । त्यसको मूल्यांकन गर्न कठिन छ । त्यसको पुनर्निर्माणका लागि सबैको साथ सहयोग जरुरी देखिन्छ ।’ 

डा.उपाध्याय नेपालको सुरुवाती नागरिक तथा सुशासन आन्दोलनका सक्रिय अभियान्तासमेत हुन् । यस्तै जुम बैठकमा कोलोराडो निवासी जुझारु नेतृ सहारा कार्कीले जेनजी युवाहरुको आन्दोलन, परिवर्तन र बलिदानप्रति नेपाली डायस्पोरा प्रतिबद्ध रहनुपर्ने बताइन् । उनले विगतमा देशलाई चाहिएको बेला नेपाली डायस्पोराले धेरै सहयोग गरेको स्मरण गर्दै अब गर्दा केही संयम अपनाउनुपर्ने बताइन् । अहिले जेनजी आन्दोलन र त्यसले ल्याएको परिवर्तनलाई सहयोग गर्दा उनीहरुसम्मै पुग्ने गरि सहयोगी हात अघि बढाउनुपर्ने उनको भनाई छ ।

‘जेनजी युवाहरुको यो साहस, आन्दोलन र परिवर्तन ऐतिहासिक छ । यसप्रति हामी नेपाली डायस्पोरा प्रतिबद्ध हुनुपर्छ’ उनले भनिन्, ‘अब हामीले सहयोग गर्दा पनि जेनजी युवाहरुकै नेतृत्व र प्रतिनिधिसमक्ष पुग्नुपर्छ । किनकी विगतमा हामीले गरेको धेरै सहयोग सदुपयोग भएको देखिदैन । अब कम्तीमा उनीहरुलाई नै खोजेर चाहिएको सहयोग गर्नुपर्छ ।’ 

​जेनजी आन्दोलनमा मारिएकाहरुको सम्झनामा कोलोराडोमा दीप प्रज्ज्वलन फोटो/नातीबाबु भट्ट 

यस्तै रक्की माउन्टेन फ्रेण्ड्स अफ नेपाल (आरएमएफएन)की अध्यक्ष आकृति राईले जेनजी युवाहरुको योगदान, साहस र परिवर्तनले नेपालको नयाँ भविष्य बनाउने बताइन् । विदेशमा बसेर नेपाली युवाहरुको आन्दोलन, बलिदान र परिवर्तनले ठूलो राहतको श्वास फेर्न पाइएको भन्दै वर्षौदेखि हामीले गरिरहेको चिन्ता र समस्यालाई यो आन्दोलनले धेरै हदसम्म समाधान खोजेको पनि अध्यक्ष राईले बताइन् ।

‘यो परिवर्तनको अपेक्षा सबैले गरेका थिए । तर आँट गर्न सकेका थिएनन् । जेनजी युवाहरुले त्यो आँट र बलिदान दिएर परिवर्तन ल्याएका छन्’ अध्यक्ष राईले भनिन्, ‘अब नेपाली डायस्पोराले उनीहरुको साथमा साथ र हातमा हात राखेर अघि बढ्नुपर्छ । उनीहरुलाई चाहिएको सहयोग सोधखोज गरेर हामीले दिन सक्नुपर्छ ।’ 

यस्तै जुम बैठकमा एनआरएनए कोलोराडो च्याप्टरका अध्यक्ष चन्द्र गुरुङले नेपालको राजनीतिक परिवर्तन र जेनजी आन्दोलनलाई जोडेर कोलोराडोमा रहेका सबै नेपाली तथा सामाजिक संघ संस्थाका नेतृत्वलाई जोडेर सामूहिक धारणा तथा सहयोग जुटाउन महत्वपूर्ण पहल गरेकोमा आयोजक अर्जुन बगालेलेलाई धन्यवाद दिएका थिए । यो छलफललाई निरन्तरता दिनुपर्ने भन्दै उनले नेपाललाई यो अवस्थामा चाहिएको सहयोग, अन्तर्राष्ट्रिय अनुभव तथा नेपाली डायस्पोराको भूमिका देखाउनुपर्ने बताए । यसका लागि आफूले सक्दो सहयोग गर्ने पनि उनले बताए ।

जुम बैठकमा कोलोराडोका अगुवा तथा सामाजिक व्यक्तित्व गंगा चौलागाइँ, नवीन दत्त, अमृत विश्वकर्मा, निलम कार्की, सुनिता दाहाल, वृन्दन अधिकारी, पवन विश्वकर्मा लगायत ३० जनाले आफ्नो धारणा राख्दै सहभागिता जनाएका थिए । साथै जुम बैठकले नेपालको पछिल्लो राजनीतिक परिवर्तन र जेनजी आन्दोलन नजिकबाट नियालिरहेको बताउँदै आवश्यक सहयोगका लागि थप पहल गर्ने र कोलोराडो अमेरिकाका सबै नेपालीको साथ, सहयोग र सल्लाह जेनजी युवाहरुलाई हस्तान्तरण गर्ने निर्णय गरेको छ ।

नेपालमा भ्रष्टाचार अन्त्य, सामाजिक सञ्जालमाथिको सरकारी प्रतिबन्ध फुकुवा गर्न माग गर्दै गएको सोमबारदेखि काठमाडौँमा जेनजी युवाहरुले शान्तिपूर्ण प्रदर्शन सुरु गरेका थिए । तर सरकारले उनीहरुमाथि चरम दमन तथा घातक रुपमा सुरक्षाकर्मीद्धारा प्रशासनिक बल प्रयोग गर्दा पहिलो दिन नै १९ जना युवाहरुको ज्यान गएको थियो । आफ्ना सहकर्मी साथीहरुको ज्यान गएपछि आक्रोशित युवाहरुले काठमाडौँ लगायत देशका सबै मुख्य सहर तथा जिल्लाहरुमा व्यापक आन्दोलन तथा आगजनी गर्दा ठूलो जनधनको क्षति भएको थियो ।

उनीहरुको आन्दोलन र आगजनीले प्रधानमन्त्री केपी शर्मा ओली पदबाट राजीनामा दिएर सेनाको हेलिकोप्टर चढेर भाग्न बाध्य भएका थिए । जेनजी युवाहरुको आन्दोलनले काठमाडौँका सर्वोच्च प्रशासन तथा ऐतिहासिक सम्पदा सिंहदरबार, संसद् भवन र सर्वोच्च अदालतमा आगजनी गरेको थियो । यस्तै पूर्वप्रधानमन्त्री देउवा, ओली र प्रचण्डका घरहरुमा आगो लगाइएको थियो ।

आन्दोलनमा सयौँ जना घाइते भएका छन् । यो समाचार तयार पार्दासम्म आन्दोलनमा प्रहरीको गोली लागेर र जेनजी युवाहरुको तोडफोडमा पर्दा तीन जना प्रहरीसहित ३४ जनाको मृत्यु भएको छ । नेपालमा अहिले जेनजी युवाहरुको मागअनुसार अन्तरिम सरकार गठन गर्ने र नयाँ चुनावमा जाने विषयमा व्यापक छलफल चलिरहेको छ । अमेरिका कोलोराडोका नेपालीहरुले शान्तिपूर्ण प्रदर्शनमा उत्रिएका युवाहरुमाथि गोली प्रहार गर्न आदेश दिएर ज्यान लिने तत्कालीन प्रधानमन्त्री ओलीलाई उन्मुक्ति दिन नहुने भन्दै पक्राउ गरेर दोषीमाथि कारबाही गर्नुपर्ने माग गरेका छन् ।