‘१०० नेपाली डायस्पोरा’ छनौटका १० मापदण्ड

अमेरिका : विदेशमा बसोबास गर्दै नेपाली समाज र विश्वव्यापी नेपालीका लागि विभिन्न योगदान दिने ‘१०० नेपाली डायस्पोरा’ छनौटमा मुख्य १० आधार तय गरिएको छ । द एभरेष्ट इंकद्धारा पहिलोपटक डिजिटल रुपमा प्रकाशन गर्न लागिएको ‘१०० नेपाली डायस्पोरा’ व्यक्तित्व छनौटका लागि मुख्य १० आधार तय गरिएको हो । जसलाई छनौटका मापदण्ड बनाइएको छ ।

नेपाल अमेरिका पत्रकार समाज (नेजा)का अध्यक्षसमेत रहेका सम्पादकीय सल्लाहकार सुरज भण्डारी र १०० नेपाली डायस्पोराका संस्थापक तथा संयोजक रहेका प्रधानसम्पादक विष्णु विवेकसहितको पाँच जनाको छनौट समितिले मुख्य १० आधार तय गरेर नेपाली डायस्पोराका ‘१०० प्रभावशाली व्यक्तित्व’को सूचि प्रकाशित गर्न लागेको हो ।

अक्टोबर अन्तिमदेखि सूचिमा रहेका व्यक्तित्वको छोटो परिचयसहितको प्रोफाइल प्रकाशित सुरु हुनेछ । डिसेम्बरसम्म पूरा सूचि सार्वजनिक गरिसक्ने छनौट समितिको तयारी छ ।  छनौट समितिले तयार पारेको १० मुख्य आधार यसप्रकार छन्ः

१. पेशागत उत्कृष्टता

२. सामाजिक उत्तरदायित्व

३. नेपाली समुदायप्रति प्रतिबद्ध

४. विवादरहित बहुआयामिक व्यक्तित्व 

५. अनुकरणीय व्यक्तिगत प्रोफाइल

६. सामाजिक सञ्जालमा स्पष्ट तर सन्तुलित

७. समाजसेवामा योगदान

८. सपना र संघर्ष प्रेरित

९. अवसर र सफलता प्राप्ति

१०. मानवता र मिडियामैत्री

माथि उल्लेखित १० वटा मापदण्डमध्ये न्युनतम तीन वटा मापदण्ड भएका व्यक्तित्व ‘१०० नेपाली डायस्पोरा’मा छनौट हुन सक्नेछन् । कुनै न कुनै सपना बोकेका र संघर्ष गरिरहेका व्यक्तित्व हाम्रो प्राथमिकतामा पर्दा न्युनतम तीनदेखि पाँच वटा मापदण्ड पूरा गरेका व्यक्तित्व ‘१०० नेपाली डायस्पोरा’ सूचिमा समावेश हुनेछन् ।

यसका लागि न्युनतम तीन वर्ष विदेशमा बसेको हुनुपर्नेछ । यदि कुनै व्यक्तित्वले छोटो समयमा पनि असाधारण काम गरेर सफलता हात पारे त्यसका लागि हामीले तय गरेका १० वटै मापदण्डमा टेकेर थप अध्ययन तथा अनुसन्धान हुनेछ । 

न्युनतम ३ वर्षदेखि १० वर्ष देश छाडेर विदेशमा बसेका व्यक्तित्व हाम्रा लागि सूचिमा समावेश गर्न सकिने व्यक्तित्वमा पर्नेछन् । यसपटक उनीहरुको अधिकतम २५ वर्षसम्मको सपना, संघर्ष र सफलताको सूचकहरुमाथि गहिरो अध्ययन गरेर मात्रै सूचिमा समावेश गरिनेछ ।

यदि कुनै व्यक्ति सूचिमा समावेश भएर पनि गम्भीर प्रकृतिका घटनामा संलग्न भएको प्रमाणित भएको खण्डमा छनौट समितिले अवस्थाको थप अध्ययन गरेर सो व्यक्तिमाथि ‘ब्ल्याकआउट’ निर्णय गर्नेछ । ब्ल्याकआउट’को अर्थ उनको नाम र फोटोमा कालो रङ प्रयोग गरेर खाली राखिनेछ ।

हामी नेपाली डायस्पोरामा रहेर आफ्नो उत्कृष्ट योगदान दिएका व्यक्तित्वलाई प्रोत्साहित गर्नका लागि यो कदमको सुरुवात गर्न चाहन्छौँ । हाम्रो कदमले धेरै व्यक्तित्वलाई जोड्ने र नेपाली डायस्पोरालाई थप राम्रो काम गर्न प्रेरित गर्ने विश्वास छ । यस सूचिमा समावेश व्यक्तित्वप्रति आउने आलोचित र रचनात्मक टिपप्णीप्रति पनि हामी जिम्मेवार हुनेछौँ ।

र, यो पनि पढ्नुहोसः 

प्रकाशकीय  : नेपाली डायस्पोरा हेर्ने एउटा नयाँ आँखीझ्याल 

सम्पादकीय नोट : नेपाली डायस्पोराको ‘१०० प्रभावशाली व्यक्तित्व’ सूचि