पहिलो ‘नेप्लिज हेल्थ प्रोफेसनल अवार्ड’ प्रा.डा. आचार्यलाई

अमेरिका : यस वर्षको प्रतिष्ठित ‘नेप्लिज हेल्थ प्रोफेसनल अवार्ड’ प्रा.डा.गणेश आचार्यलाई प्रदान गरिएको छ । ‘सोसाइटी अफ नेपलिज् हेल्थ प्रोफेसनल्स इन युरोप’ (एसएनएचपीई)ले हरेक वर्ष प्रदान गर्दै आएको ‘नेपलिज् हेल्थ प्रोफेसनल अफ द इयर २०२५’ अवार्ड प्रा.डा.गणेश आचार्यलाई दिँदै सम्मान गरेको हो ।

नेदरल्याण्ड्समा आयोजित सोसाइटीको दुई दिने सम्मेलनले सो अवार्ड प्रा.डा.आचार्यलाई प्रदान गरेको हो । युरोपेली संघ र बेनेलक्स राष्ट्रहरूका लागि नेपाली राजदूत सेवा लम्साल र ‘सोसाइटी अफ नेपलिज् हेल्थ प्रोफेसनल्स इन युरोप’का अध्यक्ष डा. विनय श्रेष्ठले संयुक्त रूपमा सो अवार्ड प्रा.डा.आचार्यलाई हस्तान्तरण गरेका हुन् ।

युरोपमा रहेर स्वास्थ्य क्षेत्रमा उल्लेखनीय योगदान गर्ने व्यक्तित्वलाई नियमित रूपमा सम्मान गर्ने योजनाअनुसार सोसाइटीले यस वर्ष पहिलोपटक उक्त अवार्ड प्रा. डा. आचार्यलाई प्रदान गरेको हो ।

सन् १९८७ मा युक्रेनबाट एमडी उपाधि हासिल गरेका आचार्यले त्रिभुवन विश्वविद्यालयसहित बेलायत, अमेरिका, स्विडेन, नर्वे र चीनका विश्वविद्यालयहरूबाट चिकित्सासम्बन्धी उच्चस्तरीय अध्ययन र विविध डिग्रीसहितको विशेषज्ञता हासिल गरेका छन् ।

हाल उनी नर्वेको आर्कटिक विश्वविद्यालयमा प्राध्यापन र स्विडेनको कारोलिन्स्का टिचिङ अस्पतालमा सिनियर कन्सल्ट्यान्टका रूपमा कार्यरत छन् ।

सम्मेलनमा सम्मानित भएपछि आचार्यले भने, ‘यस सम्मानले मेरो मेहनत र समर्पणलाई थप प्रोत्साहन दिएको छ। यो सम्मान केवल व्यक्तिगत उपलब्धि नभई युरोपमा रहेका नेपाली चिकित्सकहरूको सामूहिक प्रगति हो ।’

अनलाइनखबरमा प्रकाशित समाचारको सहयोगमा